सोलापूर शहर काँग्रेसकडून इच्छुक उमेदवारांच्या मुलाखतींना सुरुवात..

सोलापूर : आगामी सोलापूर महानगरपालिका निवडणुकीच्या पार्श्वभूमीवर सोलापूर शहर काँग्रेस कमिटीच्या वतीने इच्छुक उमेदवारांच्या मुलाखतींना सुरुवात करण्यात आली आहे. शहरातील विविध प्रभागांसाठी इच्छुक असलेल्या शेकडो उमेदवारांनी या मुलाखत प्रक्रियेत सहभाग नोंदवला. शहर काँग्रेस कार्यालयात ही प्रक्रिया राबवण्यात आली.

             या मुलाखतींसाठी काँग्रेसचे शहर व जिल्हा स्तरावरील पदाधिकारी, निरीक्षक तसेच वरिष्ठ नेते उपस्थित होते. प्रभागनिहाय उमेदवारांकडून अर्ज स्वीकारण्यात आले असून, प्रत्येक उमेदवाराची स्वतंत्रपणे मुलाखत घेण्यात आली. उमेदवारांचा सामाजिक संपर्क, पक्षासाठी केलेले काम, संघटनात्मक अनुभव, स्थानिक प्रश्नांची जाण आणि निवडणूक जिंकण्याची क्षमता या मुद्द्यांवर विशेष भर देण्यात आला.

             महानगरपालिका निवडणुकीत सक्षम, स्वच्छ प्रतिमेचे व जनतेशी जोडलेले उमेदवार मैदानात उतरवण्याचा काँग्रेसचा प्रयत्न असल्याचे यावेळी सांगण्यात आले. शहरातील पाणीपुरवठा, रस्ते, स्वच्छता, घरपट्टी, नागरी सुविधा यांसारख्या प्रश्नांवर उमेदवारांची भूमिका जाणून घेण्यात आली.

            मोठ्या प्रमाणात इच्छुक उमेदवार पुढे आल्याने काँग्रेसमध्ये उत्साहाचे वातावरण असून, निवडणुकीसाठी पक्षाची तयारी अंतिम टप्प्यात असल्याचे चित्र आहे. मुलाखत प्रक्रिया पूर्ण झाल्यानंतर वरिष्ठ पातळीवर चर्चा करून अंतिम उमेदवारांची यादी जाहीर केली जाणार असल्याची माहिती देण्यात आली.